藝術風的~《冧酒提子忌廉卷蛋》(附食譜)

Share

藝術風的~《冧酒提子忌廉卷蛋》(附食譜) 

呢排愛上玩蛋糕，所以浪接浪地做呀茂，哈哈哈~對於整餅我係初哥，所以蝦碌事亦浪接浪，上面卷蛋嘅花紋，本應好有紋路的，但一到我手，即刻變得冇紋冇路(物似主人形)，嘿嘿嘿~個朱古力蛋糊開杰咗，所以唧得唔流暢，要用牙籤幫手劃花，哈哈哈~個圖案抽象到吖，好有天師捉妖feel呢(鬼劃符)~

初時諗住整原味卷蛋的，但又覺得單調咗少少，所以加咗少少自家製冧酒提子，哈~! 又幾好吃喎，連愛吃鹹多過甜嘅大老爺都話要encore，頭先又叫我再做多條冧酒提子卷蛋過佢歎啊~ 
水波爐焗盤呎吋要嚟做卷蛋啱啱好，呎吋大約係34cm x 24cm，成品可以做到12件(每件2cm厚)的卷蛋~

哈~超有藝術風的~ 真係亂嚟架~ hahaha~

焗完成品顏色幾平均架，以前個爐做唔到呢個效果，而家終於有個啱心水嘅焗爐~ 令我繼續有動力整多ｄ蛋糕甜品~

不過個焗盤雖然夠大，但四邊就多咗條1cm濶嘅凹槽(2mm厚)，所以成品嘅四邊位置會厚咗少少，haha~完美主義者又發作了，我應該會再買過個焗盤，不過唔知呎吋啱唔啱個爐，要問問朋友先~

下圖一粒粒嘅係自家製冧酒提子，因為我家兩位小姐有份吃，唔可以落得多，淡忌廉配上冧酒提子，好好味的(我愛吃冧酒提子雪糕，所以冧酒提子賣飛佛來啊)~ 

卷呀卷，卷呀卷，卷時有少少踢腳，還幸都卷得佢似番條卷蛋~ 哈哈哈~

哈哈~個卷蛋切好後比我放嚟放去，結果比張紙痴甩底皮，好在甩咗少少啫~
今次係用分蛋法整卷蛋，組織軟綿綿的，下次試吓全蛋法先~

《冧酒提子忌廉卷蛋》食譜
材料(A):
蛋黃4隻
砂糖10克
可高溫烹調的杏仁油/菜油10克
淡忌廉30克
鮮奶20克
低筋麵粉65克
材料(B):
蛋白4隻
砂糖35克
饀料:
淡忌廉200克
砂糖15克
冧酒提子適量
裝飾:
可可粉2克
麵糊適量

做法:
1)隔水座熱鮮奶(約40度)，備用．
2)蛋黃加入砂糖以手動打蛋器拌勻．
3)淡忌廉和菜油一同以熱水座熱，以手動打蛋器攪至完全混合，倒入蛋黃糊中，然後加入已座熱的鮮奶拌勻，最後加入已過篩的低筋麵粉，以手動打蛋器攪拌至沒有粉粒，呈光滑狀即可，不要攪拌過度，否則麵糊會出現筋性，會影響口感的．
4)蛋白分三次加入砂糖，以電動打蛋器打發蛋白糊至中性發泡，取1/3打好的蛋白加到蛋黃糊，用手動打蛋器快速攪勻，用刮刀從盆底翻拌，以免蛋黃糊沉留盆底，再將剩餘2/3蛋白加到蛋黃糊，重複以上動作，取出少許麵糊，加入可可粉拌勻，放入唧袋內．
5)將麵糊由較高處倒入已鋪牛油紙的焗盤中，於表面以可可麵糊隨意唧上花紋，提高焗盤向檯面摔兩下，排走多餘大氣泡．
6)水波爐選烤焗功能convection preheat 190度12分鐘，預熱完成後，入爐(下層)，出爐後再一次提高焗盤向檯面摔摔一下，將蛋糕置架上放涼，蛋糕表面須蓋上一張牛油紙，以防蛋糕表面變乾．
(一般焗爐:將蛋糊放入已預熱達190度的焗爐內，焗12分鐘)
【溫馨提示】:不同牌子焗爐的爐溫各異，須自行調較溫度．
7)淡忌廉加入砂糖以電動打蛋器打至八成，置於雪柜(普通格)備用． 
8)蛋糕撕掉牛油紙，將蛋糕移到較大的牛油紙上，將已打發的淡忌廉平均地抹在蛋糕上，放上冧酒提子．
9)將蛋糕卷起，最後扭實兩端的牛油紙(有點像包糖似的)，放雪柜(普通格)冷藏3小時，取出切件享用．

 
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~