2017年8月5日 星期六

消暑食譜 ~《無添加菠蘿雪條》附食譜 「淘寶好物分享」~ 快捷菠蘿取果肉小工具~

消暑食譜 ~《無添加菠蘿雪條》附食譜 
「淘寶好物分享」~ 快捷菠蘿取果肉小工具~
https://kellyandruby-mami.blogspot.com/2017/08/blog-post.html
Hee hee hee~ 上個禮拜去完沖繩旅行,番到香港就真係有咁耐風流就。。。。,哈哈哈~旅行完嘅手尾係..沒完沒了的洗衫熨衫摺衫,除咗家務,仲要處理拖到最後一刻先做嘅商務工作,到今日先有少少空檔寫個人網誌咋~ 
我見到有網友查詢關於沖繩遊輪之旅事宜,蝸牛師奶稍後會逐一回應的喔~^^"
我家二小姐Ruby係雪條迷,成鬼日都話要買雪條,坊間出售嘅雪條,大部份都係糖+人造色素,想佢食得天然少少,唯有又要蝸牛師奶出馬啦~ 
大約半年前响淘寶淘咗個開菠蘿小工具,幾好用的,但就唔係每一款嘅菠蘿都適合,太細嘅菠蘿就用唔著的,一般地門菠蘿就好fit,唔會損耗過多果肉的,扭幾扭就可以取出果肉同去芯,仲可以避曬菠蘿釘,外貌十足十罐頭菠蘿咁添~ 呵呵呵~
其實早兩年見過呢款菠蘿取果肉小工具的,當時冇買到,直到上年開咗淘寶戶口之後,乜都淘一餐,見佢幾抵玩,廿零蚊人仔,跟手就淘咗佢番來喇~ Hee hee hee~
嘿嘿~買咗個地門菠蘿幾日都未得閒剪綵,拖到最後一刻先整菠蘿雪條,結果菠蘿。。過熟,幸好呀二小姐冇投訴,只要有雪條就收貨喔~ 
雪條模又係淘番來的,係Silicon西班牙品牌LEKUE,我响淘寶LEKUE旗艦店買的,所以價位稍高,減咗價一套四款都要九十九蚊人仔呀,雖然淘寶有勁多平價的矽膠模,但都係淘番品牌安心DD,我仲淘咗呢個品牌嘅馬卡龍模,遲吓會再玩番馬卡龍的~^
好鍾意呢個雪條模,因勁易脫模,我有拍到用小工具取菠蘿肉,以及製作菠蘿雪條嘅視頻的,但。。上一個甜甜圈嘅視頻都未剪輯好,哈哈~唔理咁多,而家剪輯呢個視頻先~ 嘿嘿嘿~ (P.S.:無嚟紋路的蝸牛師奶又發功了,等待甜甜圈視頻的朋友仔,請稍為忍耐,我會盡快剪片的~^3^~)
超簡易《無添加菠蘿雪條食譜》

無糖原味乳酪 200
新鮮菠蘿 180

蜜糖 1湯匙 (隨個人口味有所增減)
做法:
1)全部材料放入攪拌機打勻。
2)將少許果肉放入雪條模內,然後倒入菠蘿乳酪,放入冰格冷藏8小時即成
(我已關閉網誌留言欄,歡迎大家到我的專頁內留言~^0^~)
我在Facebook開了專頁,方便大家留言,歡迎大家加入閒
話家常啊~

何師奶 ~《全職"煮"婦生活逸事 烹飪分享》
 
我的微博,請多多關照(注) Haha~
Related Posts Plugin for WordPress, Blogger...