【必成功蛋糕食譜】~「無添加」~ 無泡打粉及梳打粉的《朱古力磅蛋糕》(附分蛋法食譜)

【必成功蛋糕食譜】~「無添加」~ 無泡打粉及梳打粉的《朱古力磅蛋糕》(附分蛋法食譜) 

上一篇的無添加「全蛋法」香蕉蛋糕，對新手朋友嚟講，係有點難度的，想當年我整「全蛋法」蛋糕都做到有點洩氣，後尾全靠「分蛋法」蛋糕令我重拾信心，及後漸漸掌握做蛋糕技巧，先再做「全蛋法」蛋糕喔~^
我諗大家會問，既然「全蛋法」有難度，點解唔一早介紹「分蛋法」做香蕉蛋糕呢? um....是咁的，我都係參考網上食譜，佢用「全蛋法」我咪用「全蛋法」囉，後尾見到網友响我的Facebook Fans Page留言及post製成品，就如我當年未熟習做「全蛋法」嘅情況一樣，打蛋糊未拿揑得好，以及加入低粉時攪拌過度而消泡，蛋糕會變得實的的呢~
為咗令新手朋友重拾信心，所以再做一個無添加「分蛋法」朱古力磅蛋糕，呢個蛋糕冇參考網上食譜，係我自己左計右計咁做出嚟，哈~! 又好ok喎，密度高少少，食落鬆軟綿密，簡單易做，係【必成功蛋糕食譜】來喔~^

「無添加」《朱古力磅蛋糕食譜》
不黏模具呎吋 18.5cm x 9cm x 5.5cm(內籠計)
材料:
蛋黃 2個
無鹽牛油 50克
鮮奶 110克
無糖朱古力粉 20克
蛋白 2個(即是兩隻蛋，沒有了蛋黃，剩餘的蛋白) 
砂糖 100克
低筋麵粉 100克
做法:
1) 無鹽牛油以暖水座溶至液態狀，加入蛋黃拌勻。

2)鮮奶加入朱古力粉拌勻，然後加入牛油蛋黃溶液拌勻。

3)朱古力溶液混合物加入已過篩的低粉中。

4)用手動打蛋器徹底拌勻至沒粉粒，不要打至起泡，拌勻至順滑即可。

5)蛋白分三次加入砂糖用「電動」打蛋器打至乾性發泡，取出打蛋器時呈勾狀不流動的。

6)取出1/4份量的蛋白霜，倒入朱古力麵糊中，以手動打蛋器輕力拌勻。

7)餘下的蛋白霜加入朱古力糊中，用硅膠刮以切拌法拌勻。以硅膠刮拌勻可減少麵糊有較大的氣泡，若新手未掌握切拌法技巧，可全程用手動打蛋器輕力將麵糊拌勻。

8)朱古力麵糊倒入不黏模中，提起於枱面輕敲數次，作用是消除大氣泡，然後放入已預熱達170度的焗爐內烤焗40分鐘即成。

若要蛋糕表面裂紋整齊，於烤焗10分鍾後取出，用小刀於中間劃一條直紋，然後放回焗爐內再烤30分鐘即可

蛋糕綿密鬆軟的~^0^~

Yummy Yummy~
大家都試試吖，必成功架~^0^~

(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
 
我的微博，請多多關照(注) Haha~