麵包篇之 ~ 香噴噴的《芝士洋蔥煙肉小方包》附食譜~^^~

Share

麵包篇之 ~ 香噴噴的《芝士洋蔥煙肉小方包》附食譜~^^~

太耐冇搓麵包了，胖嘟嘟嘅麵糰，真係令人牽腸掛肚呢~
見昨日精神番少少，忍唔住又開工搓麵包了~ 哈哈~其實今次呢個包包，係有少少符碌啊~ 本來佢嘅造 型唔係咁嘅呢~ 原先諗住將部份洋蔥煙肉卷入麵包內，但 炒完ｄ洋蔥後，發現洋蔥縮水縮得幾厲害，怕唔夠材料鋪 表面，所以今云只得個頂有材料咋，下一云我要加大份量， 等我可以卷ｄ料入包包裡面先~ 其實响好耐之前，已經想製作呢款麵包了，不過諗見要將 ｄ料切粒炒香，感覺工序好似繁瑣咗少少，所以遲遲都未 整，昨日終於"的"起心肝，製作呢個包包啊~ 嘩~! 真係香到爆燈啊~ 哎吔~! 點解之前咁懶，唔早ｄ製 作呢款包包呢~!? 實在太好味喇~~~~~~!! 而家快手分享 呢個咁美味嘅麵包食譜先~^^~ Yes~! (P.S.:我係用手搓方法，所以大家會發現，點解酵母會黐 埋ｄ鹽度嘅? 唔怕佢瓜老襯咩?? 因為我磅完材料會即刻搓， 鹽唔係漒水，唔會即刻做瓜ｄ酵母嘅，但大家用麵包機搓 麵糰，就要將佢哋分得開ｄ，因為麵包機得支棍仔攪攪吓， 冇手搓咁快均勻，所以用麵包機就要將佢哋分得開ｄ啊~)

冬天製作麵包，會因天氣凍而影響發酵速度，所以今次
我出動Miele蒸爐，佢有得調較40度嚟將麵糰發酵，勁
方便啊~ 效果同夏天發酵速度一樣，有足夠嘅濕度+溫
度，麵糰發酵得好好呢~

(P.S.:假若沒有Miele蒸爐幫手，亦可用另一個方法加
速發酵，方法係將麵糰放入焗爐內「不要開火」，放一
杯大滾水入焗爐，關上爐門，大約隔半小時左右更換一
杯大滾水，用呢個方法可加速發酵，但發酵時間都要比
夏天加長少少啊~
有部份網友介紹預先將焗爐加熱，然後放入麵糰發酵，
但呢個方法都幾牙煙，除非有爐溫計幫手，否則隨時預
熱過度，個麵包未發酵就已經變相烤焗了，因為我有朋
友領過野，所以穩陣ｄ都係加大滾水入爐(不開火)作密
室發酵，最多發現大滾水凍咗，就快手換過杯好過了~)
麵糰第一次發酵完成後，做番基本動作，分割、滾圓、
鬆弛約15分鐘，然後造型，造型後於表面蓋上保鮮紙，
放入Miele蒸爐作第二次發酵，須時約1小時~
(假若用焗爐加大滾水發酵，須時大約1小時30分鐘至2
小時，視乎焗爐加大滾水所調節出來的密室溫度而定）

响麵糰第二次發酵期間，我哋就要預備定ｄ材料喇~ 就
係要將洋蔥、煙肉切粒，然後將佢加入調味料炒香及炒
至乾身啊~

第二次發酵完成，Wow~ 至愛見到呢兩條光棍，哈哈哈~
一見佢表面光滑我就會發癲啊~ Yes Yes Yeah~!!

真係好唔捨得將佢界爆呢~ 不過唔界開佢，又質唔到ｄ
洋蔥煙肉碎入去喎~

最後掃上蛋液，平均灑上芝士碎及香草碎

香噴噴，脹卜卜的《芝士洋蔥煙肉包》出爐了~

呢款易潔模又真係幾易甩模呢~ 當日我係响將軍澳百佳
超級廣場買嘅，佢係美亞Prestige，哈~見佢減價嘛，一
見減價，就唔埋好醜買咗番屋企了，原來又幾好用喎~
嘿嘿嘿~

麵包組織鬆軟，哈~但心急師奶未等麵包完全放涼就切
了，因為屋企嗰三條友不停催，話香到忍唔住了，要快
ｄ食喎，哈~我仲驚呢個包唔夠邪惡，最後每片都仲搽
牛油添呢~ 嘩~芝士、洋蔥、煙肉、香草、牛油，真係
香到冇朋友啊~! (溫馨提示，材料要預先炒香，烤焗後
會更美味啊~ Yummy Yummy~!)

《芝士洋蔥煙肉小方包》食譜　(直接法)
工具: 不黏吐司模2個(約4吋 x 7吋)
成品 2件
麵糰材料
1．高筋粉 300克
2．砂糖 40克
3．鹽 2克
4．蛋 1隻 (約55克)
5．即用酵母 3克 (Instant yeast)
6．鮮奶 180克 (可預先將份量調較為150，然後逐漸增加，
鮮奶份量可按個人對濕黏麵糰的搓揉情況而自行調較，因我
習慣搓揉勁濕黏麵糰(差不多糊狀也ok)，所以份量要自行調
較，但不可少於150啊~ 否則麵包鬆軟度會打折扣啊~)
7．香草碎適量
8．牛油 20克鋪面材料:
1．洋蔥 1隻
2．煙肉 4片
3．芝士碎適量
調味料:
鹽半茶匙
糖半茶匙
香草碎適量

做法:
1. 將1-7 混合成麵糰，然後加入牛油搓至光滑，
將麵糰撻至起薄膜狀, 將麵糰搓圓後，置於預先鋪
上保鮮紙的器皿中，然後表面蓋上一層保鮮紙，置
於溫暖處發酵約一小時．(可參考上文發酵法)
2. 待麵糰發酵約兩倍大時，取出輕壓放氣，分割成
兩等份，把麵糰滾圓後，置於保鮮紙上，表面蓋上另
一層保鮮紙，靜置約15分鐘．
3. 麵糰壓平排氣，造型後將麵糰放入不黏模內作第2
次發酵(表面蓋上保鮮紙)．(可參考上文發酵法)
4. 將洋蔥及煙肉切粒，燒熱鑊下油，將洋蔥炒至乾身
後，加入煙肉粒及調味料炒香，盛起備用．
5. 待麵糰發酵至兩倍大時，除去保鮮紙，於麵糰表面
界斜紋，然後將洋蔥煙肉碎填入空隙中，表面掃上蛋液，
平均灑上芝士碎及香草碎，放入已加熱至180度的焗爐
內，烤焗約20分鐘即成。
【小貼士】
1.不同牌子的麵粉受水程度有異，水份會因應情況而有
所增減．(製成品緊記放入密封環境下保存，否則麵包
內的水份揮發了，麵包會變得乾身啊~)
2.冬天發酵麵包須時較長，以上食譜的麵包發酵時間，
是以一般室溫為26-30度來計算．
3.不同牌子的焗爐，爐溫各有差異，如發覺成品較乾及
深色，可自行更改烤焗時間及溫度．4.搓揉麵糰方法，可參考日清網站，我嘅搓揉麵糰方法，
大致上同佢差不多呢~ (P.S.:哈哈哈~唔好叫我玩自拍，
因為成手糊好難攪，日清網站幫到你，好~!而家去片 →　
請點擊→ 呢樹)

我的最新食譜書《自家製手作麵包》現於各大書店有售，
(商務、大眾、中華、三聯、Page One等) 因反應熱烈，
部份書店缺貨，現已加緊補貨中，因有網友反映已到書
店多次但未能成功購買《自家製手作麵包》一書，深表
歉意，網友可要求書店代為留貨，當書店一番貨，即會
通知留貨的顧客購買啊~ 多謝大家支持~感動ing~
海外網友可於以下網上書店訂購→
http://www.yesasia.com/

(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~