【盡情地吃吧】~低脂版【芒果乳酪蛋糕】(附食譜)~\(^0^)/~

【盡情地吃吧】~低脂版【芒果乳酪蛋糕】(附食譜)
~\(^0^)/~

哈哈~好鍾意食蛋糕但又怕肥? no problem la~ 一於剔走易肥嘅材料(淡忌廉同牛油)，咁咪可以暢快地吃囉~~~~~^0^~
Hee hee hee~之前說好的低脂版【芒果乳酪蛋糕】食譜，終於寫好了，灑花灑花~
其實..冇諗住寫呢個食譜，因為製作時份量預多咗，結果整咗兩個不同呎吋嘅餅，但計來計去都唔知點減番份量，變番做一個餅，哈哈~最後呢個譜都係大約咁計出來，成品可能預多咗少少架~ 

蛋糕底係用全蛋法(不加泡打粉)製作，初時諗住用分蛋法，但全蛋法嘅蛋糕「蛋」味更香，冇咁濕身同口感更鬆軟，所以都係用番全蛋法製作喔~^

哈哈哈~我家模具有限，結果圓形蛋糕配方形凍餅模，暈@.@~

下面呢個慕絲沒有加入打發嘅淡忌廉，只係用咗無糖乳酪同鮮奶，係咪奇怪點解流質嘅鮮奶可以打到變咗慕絲狀? 咪因為之前整嘅偽啤酒(蘋果啫喱)，令我諗到加咗魚膠粉嘅液體稍為雪凍後，可以用攪拌器打到穩定嘅泡沫狀態，所以用呢個方法嚟做低脂凍餅囉~^
(P.S.:如果材料係液態倒入蛋糕模，件蛋糕會索到淋滋滋，同埋個甩底模會漏材料出來，要將液態材料打到輕身泡抹狀態，先唔會出現呢個情況啊~)

今次用大大個嘅台灣芒果，多出嚟嘅芒果肉，另外做咗個蛋糕，零損耗架~^

排排坐，食粉果~ XDD
排好後表面倒入啫喱水，放入雪柜時要輕手，否則花花會浮浮吓移位架~

冷藏約8小時，切件即成~ 灑花灑花~
呢個蛋糕似陣風，丁點都不油膩，主要成份係蛋、麵粉、鮮奶同無糖乳酪，蛋糕底唔用牛油改用少許菜油，慕絲唔用淡忌廉改用鮮奶，哈哈哈，食完好似冇食過咁呢，我家二小姐Ruby話，食兩件唔夠喉，下次佢要食成個蛋糕喔~^

芒果的剩餘材料，另外製作多一個蛋糕喔~^

【低脂版芒果乳酪蛋糕】食譜 (戴頭盔先:份量係由兩個不同大小的蛋糕計算番出來，實際份量或許有少許出入的)
蛋糕模具: 6吋圓形(請自行改番做方形，haha~)
凍餅模具: 內籠6吋 x 6吋方形
(溫馨提示:其實蛋糕底嘅模具最好細過凍餅模具，即6吋蛋糕底模配7吋凍餅模，慕絲先可以完全覆蓋整個蛋糕表面，但我家模具有限，所以先用出現6吋配6吋同圓形配方形嘅騎呢現象~Wakakakaaaaaa~ )
《蛋糕底》材料:
蛋2隻(約110克)
砂糖45克
低筋麵粉45克
菜油10克
做法:
雞蛋坐熱水(約40度)分兩次加入糖打發，待泡沫打至米白色，提起攪拌器，滴落的蛋糊可劃出紋路，大約5秒不消退即打發完成，分兩次篩入低筋麵粉，以切拌法拌勻至沒有粉粒，將1/4麵糊加入菜油中拌勻，然後倒回剩餘的麵糊中，以切拌法方式拌勻，倒入模具中，放入已預熱170度的焗爐內，烤焗35分鐘，出爐倒扣，放涼切片。
(溫馨提示: 不同品牌爐溫各異，或須自行調較溫度及時間喔)
《乳酪慕絲》材料:
鮮奶150亳升
砂糖 30克 
魚膠粉 8克
無糖乳酪150亳升
做法: 
鮮奶、砂糖、魚膠粉隔熱水座溶，放涼後置於雪柜冰格冷藏8分鐘，取出以電動打蛋器打至泡，加入無糖乳酪拌勻，慕絲倒於蛋糕上，放入冰格冷藏大約8分鐘，然後再加入蛋糕，倒入慕絲，放入冰格冷藏大約8分鐘冷藏至凝固。(因要製作兩層慕絲，為加速凝固所以放入冰格冷藏數分鐘，而加入芒果啫喱後，只需放入普通格冷藏即可，不要放於冰格冷藏的喔)
《芒果啫喱》材料:
芒果啫喱粉 30克
魚膠粉 3克
水份180克
做法:
將所有材料拌勻，隔熱水座溶，放涼後倒上已鋪上芒果及已凝固的乳酪慕絲表面，放雪柜(普通格)冷藏至凝固即成．

(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
 
我的微博，請多多關照(注) Haha~