※不加泡打粉※《栗子忌廉蛋糕卷》全蛋法食譜💕

※不加泡打粉※《栗子忌廉蛋糕卷》全蛋法食譜 💕

昨日見到街邊檔炒栗子，哈~!童年回憶驅使下，忍唔住又買咗磅栗子番屋企，明知好難買番以前嘅風味，次次都貨不對版(爆曬入炭粒、栗子質素不佳、栗子肉炒燶......etc)，但又忍唔住買，哈哈~我家的刁嘴食客們，食一兩粒就冷落成包栗子啊😅~
我冇本事一人啃曬成包栗子，但有能力將佢變身，我將栗子拆殼起肉，跟住加砂糖同鮮奶製成栗子蓉，Good! 自家製栗子蓉同坊間出售嘅栗子蓉，味道完全係兩碼子嘅事，自家製會有滿滿嘅栗子香味，坊間出售嘅栗子蓉味道怪怪的，可能佢哋用罐頭栗子蓉，所以味道失真了喔😑~
原定昨日整奶油豬仔包的，為咗要消化栗子蓉，改咗整蛋糕卷啊💖~ (麵糊烤焗前) 

(麵糊烤焗後"底部")
烤完見蛋糕底咁光滑😍，有一刻衝動想整蛋糕反卷(即是用個底做面)

平均塗抹栗子忌廉然後捲起

想幫個蛋糕卷扮靚，但食客們已虎視眈眈，唯有以最快速度，灑少少糖霜裝飾吓😗，下次我都係等佢哋番曬學先整，可以有多Ｄ時間幫蛋糕卷裝飾，不過......教育局宣佈，明天又停課🙈，唔知幾時復課呢😏

材料: 
雞蛋4隻 
砂糖60克 
無鹽牛油20克 
鮮奶 20克 
低筋麵粉70克 
饀料: 
淡忌廉100克 
砂糖10克 
栗子蓉半份(一磅栗子加奶加糖，製作時純目測，所以沒有份量提供，下次製作時會記錄份量) 
做法: 
1)隔熱水座溶無鹽牛油，座熱鮮奶備用． 
2)低粉過篩備用． 
3)全蛋和糖混合，座熱水，用電動打蛋器打至起泡泛白，須不時測試蛋糊會否過熱，蛋糊溫度達40度，即可移離熱水，繼續以電動打蛋器以高速攪拌至蛋糊挺身(但不要過硬，否則較難與低粉混合)． 
4)將已過篩的低粉分3次加入蛋糊，用長柄膠刮刀以摺疊方式=fold in將粉類跟蛋糊拌勻． 
5)取少許麵糊跟牛油及鮮奶混合，然後倒回麵糊中，繼續以長柄膠刮刀以摺疊方法=fold in拌勻． 
6)將麵糊由較高處倒入已鋪牛油紙的焗盤中，提高焗盤向檯面摔兩下，排走多餘大氣泡． 
7)放入預熱達170度焗爐內焗15分鐘(水波爐選須預熱convection 170度焗15分鐘)，出爐後再一次提高焗盤向檯面摔摔一下，將蛋糕置架上放涼，蛋糕表面須蓋上一張牛油紙，以防蛋糕表面變乾． 
【溫馨提示】:不同牌子焗爐的爐溫各異，須自行調較溫度． 
8)淡忌廉加入砂糖以電動打蛋器打至八成，加入栗子蓉拌勻備用． 
9)蛋糕撕掉牛油紙，將蛋糕移到較大的牛油紙上，將栗子忌廉平均地抹在蛋糕上。 
10)將蛋糕卷起，最後扭實兩端的牛油紙(有點像包糖似的)，放雪柜(普通格)冷藏2小時，取出切件享用．

⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎⸎
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》