《鮮奶燉花膠》~滋補養顏~ 附食譜及花膠浸發方法~^.^~

Share

《鮮奶燉花膠》~滋補養顏~ 附食譜及花膠浸發方法~^.^~ 

(Update 2015-12-11 近日有不少網友查詢鮮奶燉花膠方法，所以重新載入這篇網誌，方便大家參考喔~^3^~)
屋企有不少私人珍藏，成日唔捨得出動，包括花膠、魚鰾、鹿茸、冬蟲草等等，哈哈~諗見農曆新年都叫做有藉口出動佢哋了~ 大時大節都仲唔煮嚟食，難道當咗佢哋係古董咩~ 再放多兩放，變壞就真係得個吉了~ 呵呵呵~

今次出動咗四條約九吋長嘅花膠筒，而呢批花膠筒，係親友送贈嘅，所以唔知佢幾銀~? 
 
浸發花膠，唔係想像中咁難，可以話好容易添~^0^~我試過用不同嘅方法浸發花膠，最後覺得呢款最簡單，方法是:
1)乾花膠用清水浸發一夜，約12小時或以上，緊記盛載花膠的器皿不可有油．
2)燒熱一鍋水(水份須足夠蓋過花膠為合)，加入薑片4片，將花膠放入大滾水中，熄火，加蓋焗至水溫完全放涼，將花膠取出，置於清水中，洗淨花膠後切件，保存於密實盒中，置於雪柜冷凍格，可存放數月．食用時解凍即可使用．(假若是非常厚身的花膠，則須重覆步驟(2)一次，即再放入大滾水至放涼．)

《鮮奶燉花膠》坊間有不同版本的食譜，包括先用糖水燉，最後才加鮮奶，又或者先用半份鮮奶燉，最後再加入另外半份鮮奶再燉，因為深怕鮮奶加熱久了會令營養流失，坦白說，鮮奶只要一加熱，部份營養就已經流失了，怎樣也不能避免呢~ 將簡單工序變得煩瑣，有少少搵嚟攪之感，哈哈哈~所以我唔理三七廿一，將所有材料加入燉盅內(冰糖除外)，放入高速煲內燉，一了百了無煩惱，燉好後嘅鮮奶花膠，奶香味仲好濃郁添呢~ 花膠已有高營養及滋補作用，鮮奶所流失的點點營養，也不用太在意吧，我只當鮮奶是令花膠變得更香滑的好幫手啊~^O^~ 
花膠本身有一種獨特嘅味道，為咗減淡佢獨有嘅味道，我加入兩粒大如蜜棗嘅紅棗，呢款大紅棗好香甜，要嚟焗紅棗水一流啊~ 紅棗緊記要去核，因為有核會燥熱啊~

今次又係出動我的好幫手Fissler高速煲，佢係我廚房內的紅牌呀姑，差不多日日都會出動佢，蒸煮炆燉，樣樣皆能，重點係慳時間同慳煤氣，真係教我如何不愛她~

《鮮奶燉花膠》食譜 
材料: 
已浸發的花膠180克 
去核大紅棗 2粒 
薑1小片 
鮮奶 500毫升(可按個人喜好有所增減) 
冰糖 1湯匙(可按個人喜好有所增減) 
做法: 
1)將所有材料(除冰糖外)加入燉盅內． 
2)高速煲燒熱適量水份後，放入燉盅，出綠色線後，轉最細火，以3度加壓20分鐘，減壓後加入冰糖，加蓋以最細火煲5分鐘即成．(假若以普通鍋具以明火燉，則須燉1小時至1個半小時，要視乎花膠的厚薄而定) 
(P.S.:優質的花膠，是沒有腥味的啊~)

創立自1845年德國高速煲品牌Fissler，於Sogo、一田、
永安百貨有售．
 
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~