「半自動麵包食譜」~《玉桂頂角吐司》(附食譜)

「半自動麵包食譜」~《玉桂頂角吐司》(附食譜)

細囡Ruby睇到上圖《玉桂頂角吐司》相片時，冷不防佢贈我一句:『媽咪，你強迫症又發作嗱!?』哈哈哈~乜嘢強迫症啫，吐司頂角睇落整整齊齊好有愉悅感，其實呢幾個月整咗N咁多個"頂角"吐司架啦，不過冇寫Blog之嘛，仲記得之前想分享另一個《芝麻頂角吐司》，但拖拖吓唔記得咗個食譜，所以今次快手快腳寫食譜，免得連自己都唔記得啊~^ 寫Blog嘅好處係，下次可以參考番呢個食譜，唔駛吓吓重新調整份量喔~^

haha~我真係勁鍾意整吐司的，因為我家大食怪，吃包嘅速度太快，整普通餐包一日就食曬，而吐司佢哋就可以頂到兩日份量，一條吐司最多可以切到10片，不過頭尾嗰兩片多數要嚟做多士，因為麵包皮做多士好脆口的~^

以往習慣麵糰分兩份，而家改為三份造型更容易，當發酵到差不多九分滿時(預留位置，以不會接觸到吐司蓋為準)，蓋上吐司蓋，焗好就有靚靚頂角喔~ 

麵包組織是鬆軟有彈性的~^

呀~差D唔記得講，點解標題叫做「半自動麵包食譜」? 哈~! 皆因我隻右手冇乜力，要麵包機幫手搓麵糰囉，第一次發酵完成後，攞麵糰出來鬆弛、造型同第二次發酵~ 哈~! I have today la(我都有今日喇~)，成鬼日懶醒咁話我鍾意"全人手"搓麵包，而家打字手腕都酸酸軟軟~ 睇嚟又要北上搵中醫師幫我針炙至得啊~
《玉桂頂角吐司食譜》
材料:
水份 165克
雞蛋 1隻
糖 45克
鹽 1克
高筋麵粉 300克 
即用酵母 3克
玉桂粉 2克
無鹽牛油 16克
做法:
順序將材料放入麵包機，選Dough(=麵糰發酵)程式，待發酵完成後，取出排氣，分割為3等份，鬆弛15分鐘後造型，放入已掃上固體菜油的麵包模內作第二次發酵，待麵糰發酵約九分滿時，蓋上吐司蓋，放入已預熱達180度的焗爐內，以對流風模式(Convection)烤焗28分鐘即成。
(For 東芝水波谷谷友:第二次發酵選用35度蒸氣發酵約1小時，天氣凍用水波爐發酵，真係超級無敵very good呀~^)

 
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
 
我的微博，請多多關照(注) Haha~