【超簡易食譜】《涼拌大豆芽》及分享「自家種植」無添加的大豆芽菜~

Share

【超簡易食譜】《涼拌大豆芽》及分享「自家種植」無添加的大豆芽菜~ 

年多前，見到香港團購有得賣「豆芽機＝(芽菜機)」， 當時已經勁想買，奈何蝸牛師奶手腳有番咁上吓......慢，哈~! 人哋團購截止後先話買喎，唯有下回請早啦~ 但。等呀等呀，等到團購Beecrazy都摺埋，唯有CC氣開淘寶戶口，淘部豆芽機番來囉~ (P.S.:其實我唔想開淘寶戶口的，因為覺得好似好複雜咁，同埋我知一開戶呀"購物控"必定失控呀~ hahah~)

其實响淘寶搜尋欄鍵入「豆芽機」呢三個字，就會出現N咁多款豆芽機出來，幾十蚊一部又有，幾百蚊一部都有，一層、兩層、三層，綠色、紫色、黑色，真係高矮肥瘦任君選擇，最後我揀咗銷量較多及註明BPA free嘅豆芽機，我見佢係其中一間天貓店，質量應該較有保證卦~ 一個月前我係淘寶新手，但經過一個月瘋狂購物後，已不再是新手了，我家大老爺已打算捉我去睇精神科，原因係......屋企浪接浪咁收貨囉~ 下圖係其中一次收貨實拍情景~ hahaha~

豆芽機淘番來後，不再蝸牛的蝸牛師奶立即同部機剪綵，第一次係試種跟機綠豆同紅豆，因為跟機試種嘅豆唔多，所以只種一層，哈~!第一次種唔知遮光嘅重要性，成鬼日打開遮光布偷望綠豆，結果綠豆芽菜有少少苦味，因為佢見光就即刻出現光合作用，綠豆芽菜會變苦的喔~ 下圖左邊係綠豆，右邊係紅豆，種過紅豆後，先知道紅豆芽相比綠豆會更幼，奀支支的，一啖就食曬，都係種黃豆實際D~

汲取第一次烏sir sir的種植經驗，重新整理種植方法後，成功種到飽滿嘅大豆芽菜，大豆芽菜係用黃豆種出來的，不過响香港真係好難買到靚黃豆種植大豆芽菜，假若大豆唔新鮮同埋係基因改造黃豆，就好難發芽嘅呢~ 所以當我見到全部黃豆都發芽，每條大豆芽菜都精神爽利時，真係開心到飛起架~\(^0^)/~ 今次嘅大豆係內地兩天遊時買嘅，下次番大陸睇針炙師時，會再入貨~^

朋友問，點解要自家種植大豆芽菜? 呢D嘢唔值錢，响街巿好易買到，問我係咪得閒得滯喎~@.@" 哈~! 比佢吹到啤一聲，全職師奶邊會好得閒啫~ 新聞有報導過，坊間出售嘅芽菜，大部份都加入多種添加物，見圖表可知一二~ (資料來源:低碳生活館)

明白到無辦法避開所有食物嘅添加物，不過能力範圍做到嘅，我會選擇自家種囉~ 綠豆芽菜兩日收成有一斤半，黃豆芽菜種植三日收成700克(已去除根部計)，嚟緊我會種植不同款式嘅豆類，眉豆、扁豆、黑豆、花生等等，好好奇會成品係點喔~^ 哈哈哈~! 長氣師奶發功完畢~^ 多謝大家睇咗咁大篇文，而家介紹入廚零經驗都煮到嘅《超簡易涼拌大豆芽》食譜啦~\(^0^)/~

《涼拌大豆芽》食譜 
材料: 大豆芽菜 1斤 
青蔥少許(切粒) 

調味料: 
鹽 ¾茶匙 
芝麻油3茶匙 
蒜蓉 2茶匙 
紅辣椒粉 半茶匙 

做法: 
黃豆芽菜去掉根部，燒熱一鍋水，加入2茶匙油及1茶匙鹽，下大豆芽菜，煮軟(大約2分鐘左右)，盛起，放涼後拌入調味料，灑上蔥花，置於雪柜(普通格)冷藏即成。

(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
 
我的微博，請多多關照(注) Haha~