何師奶《全職煮婦生活逸事+烹飪分享》: 「鬆軟味美的」~《自家製蒜蓉包》(附食譜)

2014年8月12日星期二

「鬆軟味美的」~《自家製蒜蓉包》(附食譜)

「鬆軟味美的」~《自家製蒜蓉包》(附食譜)

http://kellyandruby-mami.blogspot.com/2014/08/blog-post_12.html

Hee hee~好耐冇玩手搓麵包了~ 昨日忽然技癢，手搓咗個恐龍蛋出來，哈哈哈~搓完先諗要佢嚟做乜包啊~
我習慣搓揉較濕黏嘅麵糰，水份高的話，麵包更為鬆軟，但水份過多的話，麵包會升得快又沉得快，以及組織會變粗糙的，所以不要以為拼命加水是好的~ 要適量加水才是喔~^0^~
今次食譜內的濕材料份量大約是高筋麵粉的73%，濕材料內，水份約佔82%，而全蛋則佔12%，假若大家想增加/減少麵糰份量，可用以上比例作修改啊~

我家大老爺超愛吃Pizza H的蒜蓉包，but~現在PH的蒜蓉包越來越不對版，唯有自家製啦~
今次我用N年前買嘅不黏模嚟整蒜蓉包，超級very good，好好用，恐龍蛋麵糰做咗兩條蒜蓉包同埋四個餐包，哈~轉個頭比我家大食怪食曬了~
每次見到發酵後依然皮光肉滑嘅麵糰，我都會巧開心呢~

焗完表面都滑滑淨，冇爆破架，哈哈哈~不過成品物似主人型，有下身肥胖問題~ 呵呵呵~ (不過搽完牛油又回復正常喎，真怪雞~ 哈哈哈~唔通我都要搽牛油响身? )

組織巧鬆軟的，下圖已搽蒜蓉牛油，香噴噴嘅呢~ 嘿嘿嘿~

至於多出來嘅麵糰，用咗來做4個餐包，黑芝麻哇，白芝麻哇哇~ 用東芝水波爐焗好後脹卜卜，組織又是巧鬆軟的~ 開心~

《自家製蒜蓉包食譜》此食譜可製作兩個蒜蓉包(各180克)及4個餐包
材料:
1.高筋麵粉 300克
2.水份 180克
3.蛋 40克
4.砂糖 45克
5.鹽 1克
6.即用依士 3克
7.牛油 16克

蒜蓉牛油做法:
蒜蓉2茶匙(以蒜蓉器壓成蓉，不是剁的)、有鹽牛油30克
將蒜蓉放入不黏烤模內鋪平，以180度烤5分鐘，加入牛油，放回焗爐內，以餘溫將牛油溶化，混合蒜蓉牛油後，抹上已烤好的麵包內，食用時，放入已預熱180度焗爐內烤6分鐘即成．

做法:
1.將1-6 混合成麵糰，然後加入牛油搓至光滑，將麵糰撻至起薄膜狀, 將麵糰搓圓後，置於預先鋪上保鮮紙的器皿中，然後表面蓋上一層
保鮮紙，置於溫暖處發酵約1小時，待麵糰發酵至兩倍大後，將麵糰輕壓放氣, 並分割成2等份(各180克)，「P.S.:剩下來的麵糰可另外製作小餐包」，把麵糰滾圓後，置於保鮮紙上，表面蓋上另一層保鮮紙，靜置約15分鐘．
3.將麵糰壓平排氣，造型後放入不黏模內，表面蓋上保鮮紙作第二次發酵，待麵糰發酵至兩倍大時，表面掃上蛋液，灑上白芝麻，放入已預熱至180度的焗爐內，烤焗約18分鐘即成．(以Toshiba東芝水波爐烤焗，選Convection preheat功能，放入預熱至180度焗爐內烤焗10分鐘，然後轉170度焗8分鐘即成)
『P.S.:按Convection preheat功能動作是:
按Oven鍵1次，螢幕即顯示Convection preheat，扭動menu.setting鍵選擇溫度，選定溫度後再按1次menu.setting確認，然後再扭動menu.setting鍵選擇烤焗時間，最後按Start鍵，當水波爐預熱完成後會咇咇聲，跟住可以放麵糰到水波爐內，關上爐門按Start鍵以進行烤焗』Convection preheat適合一般烤焗麵包，烤焗完成後成品會脹卜卜唔皺皮的 ←個人經驗~ 還要視乎食譜而定~ hee hee hee~

我所用的焗爐是Toshiba東芝水波爐，一部機具備三種功能，可分開獨立使用(蒸爐、焗爐、微波爐)，我於Facebook開設了Toshiba東芝水波爐食譜群組，方便各網友分享Toshiba水波爐的自家美味食譜，歡迎加入群組，群組連結→『Toshiba水波爐食譜及美食分享站』
【小貼士】
1.不同牌子的麵粉受水程度有異，水份會因應情況而有所增減．
2.冬天發酵麵包須時較長，以上食譜的麵包發酵時間，是以一般室溫為26-30度來計算．
3.不同牌子的焗爐，爐溫各有差異，如發覺成品較乾及深色，可自行更改烤焗時間及溫度．
4.搓揉麵糰方法，可參考日清網站，我嘅搓揉麵糰方法，大致上同佢差不多呢~ (P.S.:哈哈哈~唔好叫我玩自拍，因為成手糊好難攪，日清網站幫到你，好~!而家去片 →　請點擊→ 呢樹)
【Loading短片等候須時，請耐心等候】~