家居實況劇 ~ 請工人的樂與怒(上集)

Share

家居實況劇 ~ 請工人的樂與怒(上集) 

哈哈哈~好耐冇寫生活逸事了~ 近呢幾個月感覺實在太正，唔寫真係對唔住自己呢~ hahah~
究竟有幾正~!? 從何說起呢? 哈~故事嘅開頭，就由一位成日話自己好忙碌嘅師奶，突然間話請工人姐姐開始........
本來諗住請鐘點，但計計吓條數，感覺請全職姐姐好似抵好多，最後請咗一位只懂講英文嘅印印姐姐(因為佢同前僱主係用英文溝通的)，哈~遇著我呢個英文水過水瓜嘅僱主，佢真係行運喇~ 哈哈哈~ 仲記得我响Facebook Fans Page出過下面張相(餃子sashimi)~  話說當日午餐想食餃子，我同姐姐講:『Put the dumplings into the boiling water』，結果。。見到碗餃子即刻笑咗出嚟，佢將D生out out嘅餃子放入碗，然後加D滾水浸住佢，咁就攪掂了~ 哈哈哈~假如我食咗呢碗餃子，睇怕比佢攪掂我都有知呀~ Wakakakaaaaaa~ 　

朋友們都問，點解等小朋友大曬先嚟請工人? 其實呢幾年我有不少外勤活動，雖然煮到晚餐，但家居清潔做得唔夠妥當，長期有成噸衫等住熨，所以請工人姐姐番來，主要係清潔家居，洗衫洗碗，但就唔駛佢煮飯，初時諗住要佢幫手買餸的，後尾..唉~佢揀食材嘅技術太好，教得嚟都係我去買餸好過喇~ 
姐姐當然有可取之處，洗熨衣服方面可以攞獎的，因為非常清潔整齊，我家小姐個衣柜都未試過咁齊輯輯的，佢連underwear都摺到好鬼靚，洗衣店攞上嚟都冇咁靚呀~

不過。。响佢番工嘅頭一個禮拜，都發生過驚嚇事件，就係姐姐無啦啦响廚房Corian洗碗盆燒佢D舊照片，話D相無用，要燒曬佢喎，嘩~!! 當時火光熊熊，我即刻開水喉滅火，佢先發醒夢話Sorry，下次唔會，佢冇諗過會有危險喎~ @.@" 

工人姐姐係一個非常虔誠嘅依斯蘭教徒(回教)，仲記得第一次响中介公司見佢時，佢有問可否比佢拜神，當時話每日五次，每次大約5分鐘左右，假若有嘢做就唔拜神的，我見每次5分鐘左右，覺得冇所謂就答應佢了，點知......原來每日五次，每次係要25分鐘，加埋拜神前佢要梳洗5分鐘，每次拜神就要用半粒鐘，哈哈哈~咁仲駛做嘅!? 幾經溝通，最後佢只係臨瞓先拜神，但就拜足一粒鐘咁囉~ 不過Kelly & Ruby唔係咁鍾意，因為姐姐同佢哋同房，姐姐會响佢哋床邊跪拜，攪到佢哋要等姐姐拜完神先入房瞓呢..　Kelly & Ruby話姐姐好似卡通片【千與千尋】嘅「無面男」，因為佢出街/拜神時，一定由頭包到落腳，仲要係全黑色的......~記得農曆新年時，樓下管理員姨姨問我，新年流流，點解比工人姐姐由頭黑到落腳都得嘅? 哈~! 我話呢個係佢哋嘅宗教，我唔會干涉佢嘅衣著，只要佢做好份工就是了~  

【溫馨提示】大家請印尼工人，當佢要求話要拜神時，就要問清楚佢要拜幾多次同埋要拜幾耐，唔好好似我咁，聽到唔清唔楚咁答應佢呀，否則要再花時間溝通就認真頭痕架喇~ 

寫住咁多先，下集會講，辭退工人姐姐需要辦什麼手續，同埋填什麼表格，以及中介公司會要求你做一D看似簡單，實則你又唔多願嘅事，下回分解啦~

家居實況劇 ~ 請工人的樂與怒(下集) https://kellyandruby-mami.blogspot.com/2015/10/blog-post28.html

(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
 
我的微博，請多多關照(注) Haha~