『炒菜翠綠小秘訣』~《海味炒泰國小椰菜》(附食譜)

Share

『炒菜翠綠小秘訣』~《海味炒泰國小椰菜》(附食譜) 

呢碟翠綠的"泰國小椰菜"，未炒前佢個樣係點嘅呢~? 哈哈~我攞咗佢其中一塊，穿曬窿嘅菜葉影咗張相~ 
拿拿拿~張相我冇做過手腳~ 我冇同佢加色架，佢炒完就變得綠悠悠，呢款菜炒完係會深色D架~

話說今日我响街巿買咗斤非常翠綠，冇穿冇爛嘅"油麥菜"，嘩~作C佢囉~ 洗菜時發現，有好強勁嘅農藥味，洗洗浸浸四次後，決定放棄了，好彩昨夜响九龍城買咗斤"泰國小椰菜"，今晚先有菜食咋~ 哈哈~呢款餓驚力嘅"泰國小椰菜"，好有呢個「我很醜但我很溫柔feel」呢，配上薑蒜片及惹味小蝦乾，Wow~巧有東南亞風味啊~
屋企位工人姐姐好怕炒菜，因為十次著咗九次佢都炒到D菜黃黃熟熟，所以我唔水佢煮飯，又唔水佢買餸(佢唔識揀食材)，哈哈~最後。。我唔水佢做了，嚟緊真係要寫番篇請工人記事錄，寫吓請工人嘅好與壞，同埋請佢番老家要辦D乜嘢手續~ hee hee hee~ 

哈~入正題先~ 點樣可以炒到D菜翠綠? 其實..鑊氣都幾重要的~ 而家我用緊不鏽鋼鑊，要燒得夠熱同均勻，炒菜先會翠綠的，假若鑊不夠熱，菜出水後揮發唔切，會成溏水同埋唔夠熱，菜就炒得唔靚架喇~ 
《海味炒泰國小椰菜》食譜 
材料:
泰國小椰菜(九龍城東南亞舖頭有售)
乾蝦米 (選購沒有黑色蝦腸的品種，因大部份蝦米的黑色蝦腸內藏沙粒，假若見蝦背有一條黑色蝦腸，就唔好買喇，否則食到成口沙)
薑片 3片
蒜頭 2粒(切片)

調味料:
岩鹽 3/4茶匙
糖 1/4茶匙

做法:
1)泰國小椰菜洗淨，摘去中間部份(去芯)，備用。
2)燒熱鑊下油，以中火煎香薑及蒜片至金黃，下小蝦米煎香，等蝦米乾身後轉大火，下小椰菜，立即加蓋焗約1分鐘，開蓋加入調味料炒勻，再加蓋焗片刻，開蓋炒勻即成。

(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
 
我的微博，請多多關照(注) Haha~