暑期親子食譜之~《自家製梳打餅》(附食譜)

暑期親子食譜之~《自家製梳打餅》(附食譜)

哈哈~ 暑假......我變得有點不務正業的感覺，淨係顧住整埋曬ｄ蛋糕/餅乾/小食，而家常小菜就ABCDE咁Random出場，哈~好在我家大老爺及小姐們冇投訴啫~ ^e^"
我好鍾意食鹹餅，成日都想自家製梳打餅，所以今日終於的起心肝整番次，第一次整乜架撐都冇，人家話要嗰ｄ切割器一個都冇，唯有用叉啦~ 哈哈哈~好在都有叉用~ Wakakaaaaaa~ 
今次係參考台灣食譜的，份量略為修改了~ 原來牛油都落得唔少啊~ 第一次整梳打餅，我未敢亂嚟改食譜，下次我會改用菜油睇吓得唔得先~ 
《梳打餅食譜》
材料: 低筋麵粉 180克、鹽1/4茶匙、食用梳打粉1/4茶匙(超巿/烘焙店有售)、水份100毫升、即用酵母5克、無鹽牛油50克
1)先將低筋麵粉、鹽、食用梳打粉混合過篩，備用．

2)即用酵母混合水份，加入已混合的粉中．

3)混合成麵糰後，加入牛油搓勻(嘩~好大舊牛油呀~ @.@"")

4)搓勻分割成兩等份，表面蓋上保鮮紙閒置約20分鐘

5)表面撲上麵粉，放入保鮮袋內，用麵棍桿平，置於雪柜普通格約10分鐘．(麵糰有兩個，所以分別桿平兩份，至於成品有幾多塊餅仔，則視乎分割了多少塊，大少隨個人喜好~)

6)取出，剪開保鮮袋，置於焗盤內(焗盤須灑上少許麵粉)，用叉子平均分割及刺孔．

7)蓋上保鮮紙發酵1小時，於表面平均掃上水份，灑上少許鹽花．

8)放入已預熱220度焗爐內烤約12分鐘(不同焗爐的爐溫各異，大家須自行略作調較)，烤焗完成後不要立即取出，在爐內閒置約30分鐘，待餅乾慢慢降溫，爐內餘溫可抽乾餅乾的水份，令餅乾變脆．

我家的一級食評人“大老爺”食後感:『非常脆，但唔似平時嘅梳打餅口感，平時嗰ｄ酥脆，你整嗰ｄ好似我細個時食嘅曬乾糕板，脆得嚟乾乾哋~』 哈~! 佢條友，兜咁大個圈都只係想表示唔似太x梳打餅，好在佢都唔停手咁攞嚟食，又或者佢太懷念兒時嘅曬乾客家糕板掛~ Wakakakaaaaaa~ 


(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~