「皮光肉滑的」~《綠茶栗子忌廉卷蛋》全蛋法~冇添加 (附食譜)

Share

「皮光肉滑的」~《綠茶栗子忌廉卷蛋》全蛋法~冇添加 (附食譜) 

Haha~ 心中的那團戚風火開始冷卻，接著卷蛋火剛燃起了，做呀茂真係好好玩呢~ 以往只愛製作家常小菜，煮煮吓冇乜火花，貪玩師奶覺得有點悶悶哋，哈~! 多謝水波谷燃點起我做蛋糕嘅興緻，家陣越玩越開心呢~ 

我冇出去學過整蛋糕，只係睇書自學的，起初都唔明乜嘢叫 fold in，跟住上網search資料，明白後就練手勢，仲記得我第一次係做海綿蛋糕，哈~真係服鬼咗自己，新手學人玩全蛋法，fold in已經唔熟手啦，仲要用蛋糊加低筋係咁fold，要將蛋糊同低粉完全混合，fold fold吓見消泡已嚇到失魂落魄，都未撈勻就隊入爐，哈哈哈~當時嘅成品算鬆軟的，不過就佈滿粉刺(低粉未撈勻，蛋糕裡面有未撈勻嘅白色麵粉)，你都咪話唔得人驚呀~ Wakakakaaaaaa~ 
如是者，玩咗三兩次蛋糕，略為掌握到竅門後，就冇玩了~ 因當時冇人同我湊熱鬧，得自己玩冇推動力，所以放棄了...... 哈~! 家陣唔同喇~ 响水波谷有一班煮食愛好者同我一齊玩，越玩越開心，我連手機遊戲都冇乜點玩了(神魔之塔bye bye了)~  哎吔~我仲欠佢哋個蛋撻食譜，過兩日補番先~ 嘿嘿嘿~

哈哈~本來想整綠茶紅豆卷蛋的，但屋企冇紅豆，所以改用日本甘栗，呢包嘢諗住就咁吃架嘛，買嗰陣時冇留意價錢，找數先知$41，有點肉赤的感覺~ hahah~ (P.S.:算是物有所值的，因粒粒都是粉甜的)

建議新手用分蛋法做蛋糕，因全蛋法難度會較高的，當你掌握到fold in手勢後，才玩全蛋法會更容易掌握啊~ (分蛋法卷蛋，可參考這個食譜→ 《冧酒提子忌廉卷蛋食譜》)
個人覺得分蛋法的蛋糕組織較綿密，氣孔較細，而全蛋法蛋糕彈性十足，氣孔會相對較大而挺身，較容易捲得靚仔的~ 

《綠茶栗子忌廉卷蛋》(全蛋法)食譜 (焗盤呎吋34cmx24cm)
話明冇添加，當然唔加發粉或任何化學輔助品的，所以蛋糊要打得足夠，同埋要拿捏到fold in技巧，蛋糕先會鬆軟架~

材料:
雞蛋4隻
砂糖60克
無鹽牛油20克
低筋麵粉50克
日本抹茶粉(烘焙用)4克(可按個人喜好有所增加)

饀料:
淡忌廉200克
砂糖15克
甘栗適量(上圖甘栗用了3/4包)

做法:
1)隔熱水座溶無鹽牛油，備用．
2)低粉加入抹茶粉過篩備用．
3)蛋和糖混合，座熱水，用電動打蛋器打至起泡泛白，須不時測試蛋糊會否過熱，蛋糊溫度達40度，即可移離熱水，繼續以電動打蛋器以高速攪拌至蛋糊挺身(但不要過硬，否則較難與低粉混合)．
4)將已過篩的低粉及抹茶粉分3次加入蛋糊，用長柄膠刮刀以摺疊方式=fold in將粉類跟蛋糊拌勻．
5)取少許麵糊跟牛油混合，然後倒回麵糊中，繼續以長柄膠刮刀以摺疊方法=fold in拌勻．
5)將麵糊由較高處倒入已鋪牛油紙的焗盤中，提高焗盤向檯面摔兩下，排走多餘大氣泡．
6)水波爐選烤焗功能convection preheat 190度12分鐘，預熱完成後，入爐(下層)，出爐後再一次提高焗盤向檯面摔摔一下，將蛋糕置架上放涼，蛋糕表面須蓋上一張牛油紙，以防蛋糕表面變乾．
(一般焗爐:將蛋糊放入已預熱達190度的焗爐內，焗12分鐘)
【溫馨提示】:不同牌子焗爐的爐溫各異，須自行調較溫度．
7)淡忌廉加入砂糖以電動打蛋器打至八成，置於雪柜(普通格)備用． 
8)蛋糕撕掉牛油紙，將蛋糕移到較大的牛油紙上，將已打發的淡忌廉平均地抹在蛋糕上，放上已切粒的甘栗．
9)將蛋糕卷起，最後扭實兩端的牛油紙(有點像包糖似的)，放雪柜(普通格)冷藏3小時，取出切件享用．

東芝水波爐分享區『東芝水波谷群組』 → https://www.facebook.com/groups/426506597487890/
 
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~