春日去濕保健湯~ 《五指毛桃瘦肉湯》(附食譜)
天氣乍暖還寒，時而刮大北風，時而似夢迷離，濕度高，周圍濕濕笠笠，自然地，大家都變咗做吸濕大笨象，吸吸埋埋唔少濕氣，結果呢．．因為身體濕氣重，變得周身乏力，烏眉瞌睡，事事提不起勁（我:煲韓劇除外~哈哈哈)~
前日見到有「新鮮」五指毛桃賣，而五指毛桃有去濕健脾功效，所以買咗幾兩要嚟煲湯啊~
以前我响藥材舖買過乾貨五指毛桃，對於佢嘅味道，飲完都冇乜印象，但今次嘅新鮮五指毛桃，我飲到佢有濃郁嘅椰香味道，五指毛桃唔係椰子，但佢有好香嘅椰子味道，入口清甜生津，可去濕健脾，啱曬我呢個濕氣極重，成日一做正經事就會打瞌睡嘅師奶啊~ Wakakakaaaaaa~
上圖嘅新鮮五指毛桃，我出盡九牛二虎之力都劈唔開佢中間部份，只能將佢嘅技節劈開，假若大家响新鮮生草藥舖買五指毛桃時，最好叫佢幫你劈開呢把柴啊~ hahaha~
拍攝呢碗湯時，因為冇食材比我對焦，只能focus到隻碗，所以成品變得詩情畫意(矇矓了)~ 哈哈哈~
《五指毛桃瘦肉湯》食譜
材料:
新鮮五指毛桃 6兩
新鮮土茯苓 6兩
瘦肉1斤
蜜棗4粒
果皮1片
水12碗(3,000毫升)
做法:
1)五指毛桃以清水浸泡15分鐘後清洗切件；土茯苓清洗切件，汆水備用．
2)瘦肉汆水備用；果皮浸軟去囊備用．
3)將水煲滾，加入所有材料，大火煲半小時後，轉中火煲2小時，最後再轉大火煲半小時，加入適量鹽調味即成．
「五指毛桃功效」(資料來源:互聯網)
五指毛桃屬桑科植物，廣泛分布萬綠湖區山上，自然生長於深山幽穀中，因其葉子長得象五指，而且葉片長有細毛，果實成熟時象毛桃時而得名，氣味辛甘，性質溫和，香氣四溢，一般采集後涼幹，食用時先取小部分用清水洗淨，用冷水再浸十五分鍾即可以與豬排骨、鴿子等煲湯，用小火慢煲，時間越長越好，使用明火，效果更佳，煲出的湯有椰奶香味。本品具有平肝明目，滋陰降火，健脾開胃，溢氣生津，祛濕化滯，清肝潤肺等作用。不論春夏秋冬，男女老少皆可食用。
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
我的微博，請多多關照(注) Haha~
