何師奶《全職煮婦生活逸事+烹飪分享》: 家中新成員『小倉鼠BB』『小倉鼠叮噹』~^3^~

2014年9月1日星期一

家中新成員『小倉鼠BB』『小倉鼠叮噹』~^3^~

家中新成員『小倉鼠BB』和『小倉鼠叮噹』~^3^~

http://kellyandruby-mami.blogspot.com/2014/09/bb3.html

我們這一家新添兩位新成員~小倉鼠「BB」和小倉鼠「叮噹」~^0^~
其實呢~我好喜歡小動物嘅，但..屋企養咗兩隻馬騮(Kelly & Ruby)，已耗盡曬我嘅精神，而養寵物係一生一世嘅承諾，所以打算等Kelly & Ruby再大個ｄ先啦~
哈~今云真係要多謝我位好妹妹，佢呀~來一招先斬後奏，殺我一個措手不及，買咗兩隻小倉鼠比Kelly & Ruby呀~

Kelly嘅小倉鼠叫BB，而Ruby嘅小倉鼠叫叮噹，佢哋兩個鍚到兩隻小倉鼠燶曬，對小倉鼠呵護備至，定時識得餵糧同加水，又會自動自覺同小倉鼠沖涼，又唔怕污糟同小倉鼠執poo poo，初時以為佢哋三分鐘熱度，要我執手尾，哈~估唔到佢哋真係咁有責任心，唔駛我執手尾喎，每日仲定時會同小倉鼠做運動呢~

小倉鼠BB好乖巧，一叫佢就走埋嚟，會用手仔輕力抓你，唔會咬人，但一放上手就孫悟空上身，郁唔停呢~ 佢會當咗Kelly隻手掌係樓梯咁，爬上爬落，哈哈~我終於明白點解小倉鼠BB為乜走夾唔抖喇~ 而家我先睇到，原來Kelly著咗件貓衫，眼舊舊咁望住小倉鼠BB呢~ hahahaaaa~

Ruby嘅小倉鼠叮噹好得意，因為有對紅眼睛，所以個樣似白兔仔，佢非常有性格，唔係隨傳隨到，心情靚會睬吓你，放上手要有技巧，否則一啖趙埋嚟，而叮噹係運動健將，入夜就不停跑轉輪，跑成粒鐘都唔肯停，至鍾意將籠內嘅粟米糠周圍潑，攪到好鬼嘈，初時以為佢哋會叫到好嘈，原來佢哋冇乜聲氣的，只係跑轉輪同潑粟米糠攪到有少許噪音吧~ hahaha~

為免比叮噹一嘢趙埋嚟，只係同佢影咗兩張相咋~

「BB」的洋房和「叮噹」的平房~ 係咪覺得奇怪，點解一間係兩層高，一間係一層高呢? 原因係......話說買佢哋番來時，寵物店話一個籠可以放兩隻倉鼠，我妹妹信以為真，結果......BB好鍾意有叮噹陪伴，但．．叮噹變咗癲噹，一見BB行埋嚟佢就發曬癲，跟住狂跑轉輪，連跑三粒鐘都唔停，仲開始有少少甩毛現象，跟住上網搜尋到，原來倉鼠愛獨居，佢緊張會甩毛架，所以立即去寵物店買過個籠比癲噹，當時寵物店得番一層嘅倉鼠籠，所以咪變成一個住洋房，一個住平房囉~

哈哈~其實我都好想寫吓生活逸事架，但兩個囡都大曬喇，我又唔想做老蚌，冇BB比我寫，咁有乜好寫啫~ 平時我嘅生活就係照顧屋企人起居飲食，清潔家居，其他就係出外試菜，品牌邀稿寫食譜，哈~斷估大家對前者興趣唔會咁大掛(照顧屋企人同清潔家居)，所以我個Blog咪得番試菜同邀稿囉~ 哈哈哈~
家陣屋企多咗兩隻小倉鼠，我會寫吓小倉鼠日誌，小倉鼠的二三事~ 話唔定遲ｄ養多隻狗，再遲吓又養多隻貓，開番個何家寵物樂園，咁就大把嘢可以寫啦啦啦啦啦~ 呵呵呵~