心戚戚的~《南瓜戚風蛋糕》(附食譜)

Share

心戚戚的~《南瓜戚風蛋糕》(附食譜) 

哈哈哈~呢期我對焗蛋糕好有熱誠，日日都心戚戚想焗戚風~ 真係要多謝水波谷嘅谷友們，佢哋日日都好勤力咁post美食，攪到我連機都唔打(手機遊戲)，淨係顧住入去睇佢哋嘅美食同埋閒聊，睇多兩睇又忍唔住焗蛋糕呢~ 啱啱谷友快樂神仙post咗蛋撻，攪到我又想整埋一份添~ 哈~都係等我玩夠咗戚風蛋糕，我就會焗蛋撻架喇~ ~ 

熟悉我嘅朋友都知道，我好少做蛋糕的，因為以前個焗爐爐溫唔準，熱力又唔平均，所以咪唔鬼焗蛋糕囉，不過而家唔怕了，因為有水波爐，佢嘅烤焗功能好好，爐溫夠平均，所以我玩得好開心呢~ (利申:之前幫東芝寫水波爐食譜，所以東芝比咗部機我寫食譜，合作雖完結，但愛上咗佢部機，現分享的食譜純個人分享)

哈哈~其實屋企有不少煮食電器及鍋具，我都一樣咁愛用，但今次我响Facebook開咗個東芝水波谷(為咗我表妹囉，佢買咗東芝水波爐，問我攞食譜，我點做到咁多比佢啫，咪開個水波谷，等大家分享水波食譜，群策群力嘛~hahaha~)，而家個谷好熱鬧，攪到我重拾煮食嘅熱誠呢~ 好開心呀~!! (For水波谷友們: 多謝咁多位谷友，特別鳴謝熱心又好人的Angel，勤力的快樂神仙，提供美味蛋糕食譜嘅Isy，大住肚但好勤力用水波嘅Sici，有水波冇奔波嘅Hippoling，仲有神龍派管理員Carol及表妹Mon，仲有多位分享美食嘅谷友，包括Patty、Shirley、Donna、Miffybaby、Tammy、Hang Ho Lee、Rita、Karmen、Pauline、Winne、Christina、Elaine、Joey、Mancy、Blanche、Ivy、Chan Tai Man、Nelly、Maggie....未能盡錄，全賴有你哋，令我可以戒甩打機，重投煮食嘅懷抱啊~ 哈哈哈~突然好似去咗奧斯卡頒獎典禮咁呢~ )

言歸正轉，今次個《南瓜戚風蛋糕》焗得好滿意，鬆軟脹卜卜，中間亦好靚仔，之前嗰兩個戚風，中間冇甩得咁靚，部份皮甩走咗少少，今次甩得幾平均，可能今次我冇咁心急，將佢倒扣咗兩粒鐘先甩模，所以先甩得靚仔ｄ．．掛~ hahaha~ 
《南瓜戚風蛋糕食譜》
材料:
蛋黃糊： 
蛋黃 2隻 
低筋麵粉40g 
日本/韓國南瓜蓉 70g
牛奶 10g 
菜油 20g 
蛋白糊： 
蛋白 2隻 
糖 25g (六寸戚風模) 
步驟：
1)南瓜切件，包上鍚紙，放入已預熱達200度的焗爐內烤10分鐘，取出壓成蓉(小貼士:烤焗後的南瓜因水份揮發了，所以重量會減輕，建議多放一些生南瓜於鍚紙上烤焗，才能有足夠的南瓜蓉啊)

2)蛋黃加菜油，以手動打蛋器混合 
3)牛奶及南瓜蓉倒入蛋黃糊中攪勻，然後篩入低筋麵粉再以手動打蛋器攪勻至不見粉粒 
4)蛋白分三次加入糖，打發蛋白糊至偏乾性，取1/3打好的蛋白加到蛋黃糊，用手動打蛋器快速攪勻，用刮刀從盆底翻拌，以免蛋黃糊沉留盆底，再將剩餘2/3蛋白分兩次加到蛋黃糊，重複以上動作，將麵糊由較高處倒入蛋糕模中，提高蛋糕模向檯面摔兩下，排走多餘大氣泡

5)水波爐選烤焗功能convection preheat 170度28分鐘，預熱完成後，入爐(下層)，出爐後再一次提高蛋糕模向檯面摔摔一下，馬上倒扣冷卻，脫模享用．
(一般焗爐:將蛋糊放入已預熱達170度的焗爐內，焗28分鐘)

東芝水波爐分享區『東芝水波谷群組』 → https://www.facebook.com/groups/426506597487890/
有關水波爐資料，可瀏覽→『東芝水波爐分享篇』http://kellyandruby-mami.blogspot.hk/2014/05/toshibapizza.html
 
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~