今日好煮意之~ 《酒香乾蔥煀雞翼》(附食譜)
《酒香乾蔥煀雞翼》呢個食譜係我自家創作，所以坊間唔會見到佢嘅芳踨呢~ 今次我唔係用易潔煲烹煮方法，而係用鑊嚟煮，所以要掌握雞翼嫩滑度，可能對新手會有少少難度~ 新手建議用我的另類方法→ 易潔煲煮雞翼~
《酒香乾蔥煀雞翼》食譜
材料: 金鳳雞中翼1磅半、秀珍菇、草菇、乾蔥頭7-8粒、蒜片、薑
雞翼醃料: 少許鹽、薑汁、紹酒、生抽、老抽
調味料:
(1) 紹酒細半飯碗(50ml)
(2) 生抽、老抽、糖、水份
做法:
1)乾蔥頭去皮切幼條狀;蒜頭切片備用 草菇一開二，然後將秀珍菇及草菇加薑汆水，隔去水份後加入少許蠔油醃好備用
2)雞中翼用鹽水解凍後，加入調味料醃約10分鐘
3)大火起鑊落油，爆香薑及蒜片後，加入乾蔥絲同炒，炒至乾蔥出香味後，加入雞中翼爆至表面上色後，鑊邊灒入紹酒(即調味料1)，加蓋片刻，然後再加入調味料(2)， 加蓋煮3-4分鐘後，轉最細火焗10-15分鐘，最後加入秀珍菇、草菇轉大火快手炒至收汁，如水份過多，可埋少許生粉水獻汁，上碟時加入麻油及灑上蔥花即成．
【小貼士】
(1)金鳳雞中翼肉質較新鮮及好少機會有雪藏味，所以係入貨不二之選呢
(2)雞翼用鹽水解凍作用係，鹽水會加速解凍過程，同埋可去除部份雪藏味，若恐選購的雞翼有雪藏味，可加數滴新鮮檸檬汁，即可去除雪味．
(3)菇菌有特有嘅異味，所以一定要預先加薑汆水
(4)雞翼要煮得滑，秘訣在於先大火，後用最細火慢慢焗，咁樣雞翼會超嫩滑呢~ 但煮呢味餸菜時，火力及水份要控制得宜，否則水少會焗乾，水多會影響成品嫩滑口感呢~
(5)雞翼是否過火，單憑肉眼亦可以觀測到，因為雞翼若過熟，雞翼內嘅雞骨會伸曬出嚟呢~ 表皮就失去光澤，因為水份過份流失，就好難滑口呢~
(6)紹酒經烹調後，酒精會揮發，只餘少許酒香，所以呢味餸菜小朋友都食得呢．
Remarks:- 我所提供嘅時間只能作參考之用，因為爐頭火力各異，要自己執生啊~
(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》
我的微博，請多多關照(注) Haha~
