「簡單潤一潤」之~《快靚正蕃薯糖水》(附食譜)

「簡單潤一潤」之~《快靚正蕃薯糖水》(附食譜) 

每次响糖水舖叫蕃薯糖水來吃，都覺得有點豬仔的感覺，因為蕃薯糖水成本低同埋真係易做到暈，但我是一條麻煩友，每次見到糖水舖嘅餐牌，就會出現選擇困難症，食糊又嫌佢加得粉太多，杰pat pat難入口，揀來揀去，最終都只係揀「蕃薯糖水」或「雪耳木瓜糖水」，哈~可能你哋會話，咁難揀做乜仲要幫襯糖水舖啫~? 唉......同親友出街吃完飯，佢哋愛幫襯糖水舖嘛，冇奶油我眼光光坐响樹架嘛~ 咪求其點碗來吃囉，不過唔明點解，咁簡單嘅蕃薯糖水，糖水舖都可以煲到佢走樣的，多數係個糖水甜到蛀牙，又或者ｄ蕃薯唔靚，好多纖維，哈~我都話我係麻煩友來，所以都係自家製先啱心水啊~ 
以往煲蕃薯糖水，我會揀橙色肉嘅蕃薯，但近年愛上呢款→

韓國蕃薯，佢係黃肉，冇乜纖維，食落有少少栗子嘅香味，用嚟煲蕃薯糖水或者要嚟烤焗都一樣咁good架~ 上圖嘅蕃薯我响Taste買嘅，但唔記得咗幾錢(一入超巿就失心瘋，買完連張單飛咗去邊都忘記了)，好似廿零蚊．．掛~ hahaha~ 

入正題~ 蕃薯糖水真係好易做，同煲老火湯差唔幾，都係將ｄ材料掉曬落去煲就攪掂(老火湯只多一個工序，將部份材料汆水)，而煲蕃薯糖水就更簡單，水滾後，放去皮切件嘅蕃薯，加舊拍扁咗嘅薑(薑係蕃薯糖水嘅靈魂，加咗會香ｄ架，怕辣就落細舊ｄ，又或者煲到半路，等薑出味就掉咗舊薑啦~ )
水份唔駛落過多，如下圖浸過曬ｄ蕃薯再多ｄｄ就ok了~ 

加入材料待水再滾後，加蓋大火煮約10分鐘(要睇火，小心滾瀉)，然後轉細火煮約10分鐘，最後轉中火，加入片糖，待片糖完全溶解煲多2分鐘就吃得了~ 

咁易煲嘅蕃薯糖水，今晚大家都煲番煲來潤潤啦啦啦啦啦啦~ 睇吓製成品，顏色幾通透，呢款蕃薯真係冇乜粗纖維架，哈~煲完蕃薯糖水，下次煲雪耳木瓜糖水先~ 

《蕃薯糖水》簡單食譜
材料:
韓國蕃薯(我用咗三條蕃薯)(去皮切件)、薑1片(拍扁)、片糖1片
做法:
將水煮滾後，下蕃薯及薑，加蓋大火煲10分鐘後轉細火再煲10分鐘，轉中火，下片糖，待片糖完全溶解後再煮2分鐘即成．


(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒
話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~