麵包機 ~ 《蒜香吐司》(附食譜)

Share

麵包機 ~ 《蒜香吐司》(附食譜) 
哈哈~忽然好想食有蒜香味道嘅麵包，所以即刻整咗少少炸蒜蓉，跟住將佢壓碎後，加咗入麵包食譜內，嘿嘿嘿~仲要係懶過鬼，連食譜都懶得諗，只係將早兩日個《酥蔥吐司》食譜，係咁椅改咗少少，跟住就整咗呢個香噴噴嘅蒜香吐司出來喇~

即係咁，其實我都好想玩手搓麵包，之但係，暫時呢．．時間上唔容許我玩手搓麵包，因近期貪玩師奶好想見識更多不同嘅食肆，所以四出試菜，所以少咗時間玩手搓麵包囉~ 因為玩手搓麵包，起碼用咗我半日時間，所以暫時要繼續欣賞呢個咁有個性嘅外形→『倒模式吐司』啊~ Wakakakaaaaaa~ 睇嚟睇去都係得一個shape，haha~ 好在佢嘅texture又幾令人滿意嘅~

網友問:牛油同酵母應該放响邊個位置? 
所以我影咗下面張相，over over~ 呢個位置啊 ~ 收到冇~? 哈哈哈~ 

緊記麵包機食譜要順序放材料，假若調轉咗會影響攪拌啊~ 首先係濕材料，跟住先係乾材料啊~ 

加咗蒜粉嘅《蒜香吐司》，烤焗時，真係香到九條街都"聞"到呢~ 要緊記，炸蒜係好香，但落得過多會令麵包帶有苦味，所以．．請跟食譜份量，落多咗唔好問我點解，我知道有好多精靈朋友會自己改食譜，哈哈哈~ 我只可以話，只要跟足食譜所用的材料及份量，你所製作的吐司保證可以同上圖成品是一樣的啊~ 
《蒜香吐司食譜》
(Design Factory麵包機)
做法:
(Step One)
先將以下材料放入不黏模內膽: 
水份160克 
雞蛋20克 
鹽2克 
糖35克 
(Step Two)
然後將以下材料放入不黏模內膽: 
高筋麵粉240克 【我所用的是韓國麵包粉，759做特價時購入】
自家製炸蒜粉5克
即用酵母3克 (不是乾酵母，而是即用酵母，雖然佢哋外貌似到不得了，但使用方法及份量有別，即用酵母於烘焙店有售，我所選用的是購自【二德惠的袋鼠牌即用酵母】) 
無鹽牛油16克(牛油須預先室溫放軟)【我所用的是塔牌無鹽牛油】
(Step Three)
Design Factory 麵包機選用1號程序Basic，然後揀選 color為Light，蓋上機蓋，然後於麵包機剩下20分鐘時間時，可自行按掣熄機，按stop 三秒即可． 

(我已關閉網誌留言欄，歡迎大家到我的專頁內留言~^0^~)
(我在Facebook開了專頁，方便大家留言，歡迎大家加入閒話家常啊~)
何師奶 ~《全職"煮"婦生活逸事 烹飪分享》

我的微博，請多多關照(注) Haha~